Датум на средба/настан: 24.03.2022
Тема/наслов на настанот: Дискусија за етичката рамка
Регион: Југоисточен регион
Почитување и унапредување на етичката рамка на известување ќе значи поголем кредибилитет на медиумите
Подобрување и унапредување на етичката рамка за известување за поголема кредибилност на медиумите на пазарот и стекнување поголема доверба кај јавноста беше основата за дискусија на денешната онлајн средба на медиумските работници од Југоисточниот регион во земјава, заедно со Советот за етика во медиумите. На Средбата присуствуваа новинари, дописници и уредници кои дадоа свои видувања и размислувања за тоа како да се подобри етичкиот пристап на известување во услови кога медиумскиот простор е опкружен со контуинирани дезинформации и лажни вести.
,,Подобрување на етичкиот кодекс на известување значи и подобрување на бизнисот на медиумот. Со пласирање на информации кои се базирани на етичкиот кодекс добива кредибилитет и го подобрува угледот на пазарот, а паралелно ја зајакнува соработката со заедницата. Како Совет на етика овде сме да ги слушнеме мислењата од директните чинители, како што се новинарите за да укажат со кои проблеми се соочуваат и во која насока треба да се движиме за да ја подобирме етичката рамка, кажа Марина Тунева, извршна директорка на СЕММ.
За етичките предизвици во медиумите и саморегулацијата зборуваше Мирче Адамчевски, претседател на Комисијата за жалби при Советот за етика. Тој повтонро укажа дека етичкиот кодекс најмногу се крши од страна на онлајн меидумите, каде што и понатаму се шират дезинформации, лажни вести, при што авторите најчесто го нарушуваат членот 1 од Кодексот, односно неетичко, нефер и неточно информирање.
,,Осумдесет проценти од претставките до нас во Комисијата се однесуваат на известување од онлајн меидуми. И понатаму има текстови со лаги, непроверени извори, сè почесто наидуваме на изразот „се дознава“, без да се каже изворот, одат со сензационалистички наслови и на тој начин се манипулира јавноста и деградира новинарството“ рече Мирче Адамчевски.
Со наведување на неколку примери за кои добиле поплаки и претставки, Теофил Блажевски од Комисијата за жалби при СЕММ посочи на кои точки од етичкиот кодекс треба да се работи за да се унапреди начинот на известување.
,,Кај нас Кодексот е донесен во 2001 година. Но, секоја рамка треба да се унапредува. Анализирајки ги поплаките, сфативме дека треба да се размислува за да се подобрат членовите 1, 3, 7, 8, 9, 13 од Кодексот, за да нема заблуди при известувањето. Медиумите имаат голема улога, но притоа мора да се заштити јавноста од дезинформации, непрофесионално известување, посебно сега кога сè уште сме во пандемија, но и во услови кога има агресија над Украина“, рече Блажевски.
Медиумските работници од Југоистокот се согласија дека етичката рамка треба да се унапреди, да се известува професионално без лажни вести и сензационализам. Паралелно побараа да се зајакне Регистарот на професионални онлајн медиуми, за да се укаже на заедницата кои интернет портали работат според етичкиот кодекс.
Онлајн средбата беше организиран во рамките на проектот ,,Поддршка на слободата на изразување во медиумите во Северна Македонија“, што го имплементира СЕММ а го финансира ЕУ и со поддршка преку програмата Цивика Мобилитас.
