Советот за етика во медиумите на Македонија покрена мрежа за медијација при решавање на жалби против медиумите за евентуално прекршување на Кодексот на новинари и Насоките за етичко известување на онлајн медиумите. Мрежата е на доброволна основа, составена од петнаесетина новинари од различни градови низ Македонија како и активисти од невладини организации. Во обид да охрабрат „пријателско решение“ односно компромис, членовите на мрежата за медијација ќе им пристапат на двете страни, во случај на покренат спор против некој од медиумите во земјава, пред случајот да стигне на разгледување од членовите на Комисијата за жалби при СЕММ.
Во рамки на проектот „Медиумските совети во дигиталното доба “4“ , во кој учествуваат неколку совети за етика од Европа, универзитети и новинарски организации, а кој е финансиран од Европската Унија, СЕММ се заложи за повидлива промоција на компромисните решенија, со оглед на фактот што до сега повеќе од 90% од поднесените жалби се решаваат без ефикасна употреба на овој механизам. Со засилување на медијацијата, односно со јасно покажана волја од уредниците и новинарите да се извинат или да ја поправат содржината во која е направено пречекорување на стандардите за професионално и етичко известување, се очекува да се зголеми и довербата во медиумите, но и да се гарантира почитување на правото на граѓаните да бидат точно, објективно и навремено информирани. Како резултат на засилување на медијацијата се очекува да опадне и тенденцијата – одлуките на Комисијата за жалби да се користат пред суд, како дел од покрената постапка против медиумите, што оди во прилог на заштитата на слободата на изразување. Медијацијата, како еден од важните елементи на медиумската саморегулација е исто така прилика случаите на евентуално неетичко известување да се решаваат без мешање од трети страни (суд, институции, центри на моќ…), што исто така може да ја загрози медиумската слобода.
За унапредување на медијацијата како механизам на медиумската саморегулација во европските земји, Советот за етичко новинарство на Белгија (Le Conceil de deontologie journalistique), како активност во проектот Media Councils in the Digital Age #4, ги мапираше посточеките правила и процедури за медијација на 37 саморегулаторни тела низ Европа, при што креираше таканаречен “Сatalogue raisonné” во кој се содржани различните пристапи, но во кој се посочени и редица добри практики кои што би можеле да послужат за унапредување или адаптирање на постоечките процедури во одделни земји. При тоа се нагласува важноста и потребата од медијацијата, односно алтернативно решение, при одлучувањето за пристигнатите жалби, особено од призма на засилувањето на дијалогот меѓу јавноста, новинарите и медиумите.
Повеќе детали за ова истражување може да се прочита на: www.presscouncils.eu