Në seancat e mbajtura: në Shkup – në kuadër të Javës së edukimit mediatik, në tetor të vitit 2023, pastaj në Manastir – në Shtëpinë Evropiane në mars të këtij viti dhe në Shtip – në Universitetin “Goce Dellçev” në qershor të vitit 2024, morën pjesë një numër i madh i gazetarëve, aktivistëve civilë, studentëve, nxënësve të shkollave të mesme dhe profesorëve. Sesionet ishin tematike me diskutime të përqendruara në edukimin mediatik dhe ndërgjegjësimin e qytetarëve për shkeljet e Kodit të gazetarëve, mbi dëmshmërinë e gazetarisë “copy-paste” kur rishkruhen tekste të tëra pa cituar burimin, dhe mbi përgjegjësinë e mediave në përhapjen e gjuhës së urrejtjes, veçanërisht kur bëhet fjalë për komentet në rrjetet sociale në lidhje me përmbajtjen e mediave.
Seancat publike të Komisionit për Ankesa në KEMM ishin një mundësi për të pranishmit për t’u bërë një sërë pyetje anëtarëve të Komisionit për Ankesa, për të shkëmbyer përvoja, por edhe për të vënë në dukje problemet me të cilat përballen gazetarët lokalë – më së shpeshti presionet nga fuqitë politike dhe të biznesit lokal dhe pengesat në sigurimin e informacionit në kohë.
Seancat publike të Komisionit të Ankesave gjatë vitit 2023/24 u mundësuan me mbështetjen financiare të UNESCO-s, në kuadër të projektit rajonal “Ndërtimi i besimit në mediat e Evropës Juglindore: mbështetja e gazetarisë si një e mirë publike”. Ky projekt mbulon Këshillat e Etikës në vendet e Ballkanit Perëndimor – Bosnja dhe Hercegovina, Serbia, Mali i Zi, Shqipëria, Kosova dhe Maqedonia e Veriut, si dhe Këshillin e Turqisë, me qëllim të ngritjes së vetëdijes në të gjithë rajonin për domosdoshmërinë e gazetarisë cilësore dhe të përgjegjshme, si një nga shtyllat themelore të një shoqërie demokratike.
Këshilli për Etikë në Mediat në Maqedoni inkurajon qytetarët, institucionet dhe organizatat e shoqërisë civile të përdorin mundësinë për të paraqitur ankesë në KEMM, sa herë që ata dyshojnë se ndonjë nga përmbajtjet e mediave tejkalon rregullat për raportim të përgjegjshëm dhe profesional, sipas dispozitave të Kodit të Gazetarëve të Maqedonisë.
Pas seancave të hapura në Shkup, Manastir dhe Shtip, anëtarët e Komisionit për ankesa dhe përfaqësuesit e zyrës ekzekutive të KEMM-it do të vazhdojnë takimet e drejtpërdrejta me qytetarët dhe gazetarët në qytetet e tjera në Maqedoni.